ናይ ሓዘን መግለጺ። 

በቲ ኣብ መዓልቲ ሆሳእና፡ ናብ ኣምላኾም ጸሎት ኣብ ዘብጽሑ ዝነበሩ፡ ኣሕዋት ኦርቶዶክስ ተዋህዶ ግብጻውያን፡ ብግብረ ሽበራ ዝወረደ ግፍዒ፡ ኩልና ኣባላት ደብረሰላም መድሓኔ ዓለም፡ ልብና ዝተነኻእና ምዃንናን፡ ናይ ሓዘኖም ተኻፈልቲ እውን ከም ዝኾንናን ንገልጽ።  
 
እዞም ንጹሃት ሰባት፡ ብደሓን ካብ ገዝኦም ወጺኦም፡ ምስ ኣምላኾም ብጸሎት ክራኸቡ፡ ብሰላም ኣብ ውሽጢ ቤተ ክርስትያኖም እንከለዉ፡ እዚ ዘይተሓስበ ሰይጣናዊ ግፍዒ ክወርዶም እንከሎ፡ ንዓለም ዝስደመመ ኣርሜንነት ምዃኑ ዓለም ኣስሚራትሉ ኣላ።  እብ’ዚ ዝመንና፡ እዚ ፋይዳ ዘይብሉ ኣረሜናዊ ቅትለት እዚ፡ መዋዳድርቲ ዘይብሉ ኢ-ሰባዊ ግህሰት ኢዩ።  ኣብ ብዓል ሆሳእና፡ እዚ ናይ ሓዘን ዜና ምስ በጻሓና፡ ካህናትን ምእመናንን ደብረሰላም መድሓኔ ዓለም ሓቢሮም፡ ጸሎት ናብ ኣምላኽ ኣብጺሖም ኢዮም። ቀጺልና እውን፡ ናብ ክቡር ጳጳስ ኣርሰኒ ኣብ ሃገር ሆላንድ፡ ደብዳቤ ብምልኣኽ ናይ ሓዘኖም ተኻፈልቲ ምዃንና ገሊጽናሎም ኣሎና። ነቶም ካብ ገዝኦም ምስ ወጹ ከይተመልሱ፡ በዚ ግፍዒ እዚ ዝሓለፉ ኦርቶዶክስ ተዋህዶ ህዝበ ክርስትያን፡ ኣብ ሰማያዊት ኢየሩሳሌም፡ ኣምላኽ ብክልተ ኢዱ ይቀበሎም። እግዚኣብሔር ኣምላኽ ከኣ ነቶም ስድራቤቶም ጽንዓት ይሃቦም።   
 
እግዚኣብሔር ገበርቲ እከይ የርሕቐልና፥ ካብ ክፉእ ዘበለ ይሰውረና። 
 
ሰበኻ ጉባኤ ደብረሰላም መድሓኔ ዓለም